حلاوة الجبن السورية

حلاوة الجبن السورية بطريقة رائعة - حلويات ومعجنات سورية في المانيا 

حلويات ومعجنات سورية في المانيا طريقة ومقادير حلاوة الجبن..كاسة ونصف ماء. كاسة سكر. عالغاز ومنحرك شوي بعدين كاستين سميد وسط منفضيهن ومنحركهن منيح والغاز يكون ضعيف. منفضي شوي ماء الزهر حسب الرغبة. وينخلطو شوي حتى تجمد العجينة شوي فورا منحط الجبنة. موزريلا أو جبنة البيتزا. شي 250 غرام.  ومنخلطهن على نار هادئة بس دابت شوي الجبنة. منطفي  الغاز فورا ومنخلطهن مع بعض منيح حتى تدوب كل الجبنة. بعدين منحط العجينة على نايلونة كبيرة ومنمدها بعدين منلف النايلونة ومنحطها بالبراد ساعة. والقطر كاستين سكر كاسة ماء وعصرة ليمونة حامضة حتى يغلي منطفي الغاز.

طريقة القشطة. طريقة جديدة وطيبة. ليتر حليب. منحط عجنب كاسة حليب .ومنفضي الباقي بطنجرة عالغاز مع 4أو 5 معالق سكر + 5معالق سميد .مع قليل من ماء الزهر. منحركهن منيح على الغاز حتى يغلو. منكون مجهزين عجنب كاسة الحليب منحطها بصحن واسع مع 5 معالق نشاء وشوي ماء الزهر. منخلطهن منيح. بس يغلي الحليب عالغاز منفضيهن فوق الحليب ومنحرك على نار هادئة حتى يجمدو شوي خلال ثواني. منطفي الغاز. ومنحط معلقتين زبدة فوقهن ومنخلطهن حتى تدوب الزبدة.
ويلي بيحب بيجيب علبة قشطة صغيرة جاهزة من الماركت ويحطها معن ويخلطها ببعض. بيصير مع علبة القشطة أو بدونها مو مشكلة. وصحة وهنا